Aizawl: MNF President Zoramthanga’n ZPM kaihhruai sorkarin martar-te thisena lei Mizoram leh hnam himna chabi chu Forest Conservation (Amendment) Act, 2023 hmangin mi dang kutah an pe nia sawiin, pawi a tih thu a sawi.
MNF party chuan Inrinni khan Mizoram leh hnam tana zalenna suala nun hlantu martar-te hriatrengna, Martar Day vawi 45-na chu Mizoram chhung hmun hrang hrangah urhsun takin an hmang a. A hmanna pui ber Aizawla MNF party pisa, Hnam Run-a inkhawmah chuan MNF President, chief minister hlui ni bawk, Zoramthanga chuan hnam matarte hi chu Burma, Bangladesh leh Mizoramah an awm a. An chhungte, an tu leh fate thlah kalzel thahnem tak avangin MNF zungkaihna hi a nghet lo thei lo tih a sawi.
MNF President chuan ram tana nun hlantute inpekna avangin Mizoram leh hnam chuan special protection (Article 371,G) an nei a. Inhumhimna bik an neihnate hi martarte thisen leh Zoram mipui zawng zawngin an tawrh man a ni tih a sawi.
Zoramthanga chuan ram danpui Article 371-G hmanga Mizoramin inhung bikna an neih chu hnawk ti pawl an awm a, dan thar Forest Conservation (Amendment) Act, 2023 siam a ni ta tih a sawi a. MNF chuan he dan hi hman an duh lo va, Assembly House-ah hial an duh loh thu an pass laiin, ZPM kaihhruai Mizoram sorkarin chu an inhung bikna kulh chahbi chu kawngka chhung atangin midang kutah an pe ringawt mai ni-a sawiin, “Ram tana thisen pe ve lo, thihchilh ve lo leh hnam thuthlunga ding ve loten dawih aw pua, an tlawm rang lutuk leh kum khat tha awrh an sorkar hnuah Mizote sakhua, culture leh ram neitu nihna, kan inhumhimna chahbi an pe mai hi a pawi takzet a ni,” tia sawiin, special session koin MNF sorkarin a hnawl ang khan hnawlin, sut leh ngei turin ZPM sorkar an phut tih a sawi.
Martar Day hi MNF Sr. Vice President Dr. R. Lalthangliana’n West Phaileng-ah; MNF Vice President Vanlalzawma’n Lungleiah, Lalchhandama Ralte, Leader of Opposition, MLA & Vice President-in Mamitah, Champhaiah MNF Treasurer Lalruatkima; Tawnluia, Ex-Dy. CM & NCC MNF in Khawzawlah an hman pui bakah, Lalchamliana, Ex-Minister & NCC chuan Kolasib ah, Er. Lalrinawma, Ex-Minister & General Secretary, chuan Khawbelah, Robert Romawia Royte, MLA & President, MNYF hovin Serchhipah, T. Liansiama, General Secretary chuan Hnahthialah a hmanpui a, Dr. L. Thangmawia, General Secretary hovin Saitualah, Lalremruata Chhangte, General Secretary chuan Keitumah leh Lalrinenga Sailo, Mayor AMC & Adviser chuan Tlangnuamah a hmanpui bawk.