Aizawl: India ram pum a hman mek, Swasth Nari, Sashakt Parivar Abhiyaan – Health Camp runpui neih mek chu Zoram Medical College & Hospital, Falkawn hnuaia Dept. Of Community Medicine te leh MRHRU, Aibawk te tangkawp buatsaihin, Aibawk khuaah Health Camp hlawhtling tak hman a ni.
Health camp-ah hian Family Adoption Programme hnuaia ZMC-a MBBS zirlai te’n Aibawk khuaa an chhungkua adopt te leh enkawl te an hruai khawm a ni.
MRHRU, Aibawk hnuaia chhungkaw thlan bikte pawh he Health Camp-ah hian test hrang hrang tih sak a ni.
In entir tura kal zawng zawng te tan BP, rih zawng leh san zawng te en sak an nih bakah, zunthlum leh thisen test sak an ni a. TB screening te neih niin Xray ngai te tan chuap Xray sak nghal an ni a, a thlawnin damdawi sem a ni bawk.
Damlo inentir zawng zawng hi 240 niin, ZMC&H Doctor eng emaw zat leh Aibawk PHC MO te’n damlo te hi an en a. Aibawk PHC Doctor leh thawktute pawhin an tawiawm bawk.