Aizawl: Dampa bial by-election lo awm tur atana final electoral roll chu tlangzarh a ni a. Vote nei zawng zawng hi mi 20,790 an ni.
Thawhlehni khan District Election Officer K. Laltlawmlova chuan DC Conference Hall, Mamit-ah a tlangzarh a. Final Roll tlangzarh takah hian vote nei zawng zawng mipa 10,605 leh hmeichhia 10,185, an vaiin 20,790 an ni a, Draft Roll atanga vote nei punna hi voter 385 a ni.
Polling Station 41 awmin, Polling Station pakhat zelah voter 507 awm ang an ni a. Voter tlemna ber hi 2/12-Zopui Polling Station niin voter 30 an awm a, voter tamna ber hi 2/17 – Silsury -I Polling Station a ni a, voter 1103 an awm a. Service voter 115 a awm bawk.
Dampa (ST) AC Final Electoral Roll tlangzarh tak hi K. Laltlawmlova, District Election Officer chuan political party aiawhte hnenah a hlan nghal.
Final Electoral Roll tlangzarhna hunah election official-te, political party aiawhte leh thuthar thehdarhtute an tel a ni.