Aizawl: Health department hnuaia Integrated Disease Surveillance Programme (IDSP) chuan tun hnaia hritlang (influenza) leng mekah mipui fimkhur turin an chah.
Thuchhuah an siamah IDSP chuan tunlai hian India ram hmun hrang hrangah influenza natna a leng mek a, he natna hi Mizoram chhungah pawh hmun hrang hrangah vei an awm tih hriat a ni a, Lunglei District-ah pawh sikul pahnih lai mai hrileng avang hian khar a lo ni tawh a, he natna hi inkaidarh theih anih vangin mipuite fimkhur turin an chah.
IDSP tar lan danin, he natna lanchhuah dan tlangpui chu khawsik, luna, taksa na, sil themthum, ruhna leh chau, thawhah, hritlang, khuh, hrawk na leh naupangah kawthalo leh luak a awm thei tih an tar lang.
He natna hi mihring leh mihringah, khuh leh hahchhiau atangin leh kuta thil an khawih atangtea inkaidarh theih a nih avangin raipuar, nausen, kum upa lam, natna benvawn nei leh hun rei tak chhung damdawia inenkawl ngaite chu fimkhur an ngai zual a. Invenna atan puipunna hmuna awm tam lo turte, mit, ka leh hnar te khawih loh tur te, midang nen kut leh kut invawn / inchibai lo hram tur leh mahni rinthu a damdawi ei lo turtein an chah.
Hmui leh ka te, khuh leh hahchhiau in inhup thin tur te, sahbawnin kut fai taka sil thin tur te, thil tuiril in tam tur te, hritlang khawsik an neih chuan midang te hnaih lo a awm turte leh loh theih loh anih pawh in face mask vuah thin turte’n an chah bawk.