Sepahan SC tlawha fehchhuak tur an nih laiin Iran-ah an player thenkhat an zin duh loh avangin Mohun Bagan Super Giant-in thutlukna an siam a, AFC Champions League Two atangin an inhnukdawk.
Thawhlehni khan Sepahan nena inkhel tur an ni a, inrinni khan Indian Super League champion Mohun Bagan chuan an khel thei dawn lo tih an thlen tawh a, a chhan chu India ram pawn atanga an lak luh player-te Iran-ah an zin duh lo a, an chenna ram atanga zin lo tura thurawn an dawn vang niin an sawi.
AFC chuan hemi chungchang hi a ngaihtuahtu tur committee-ah thlen ve lehin competition dan an neih mek angin thutlukna an siam a, tournament atanga Mohun Bagan an inhnuhdawh avangin an lo khelh tawhna pawh awmze nei lo a ni dawn a, Group C-in group league an khelh zawh hnuah eng mah nghawng a nei dawn lo a ni.
September 16 khan Mohun Bagan hian Turkmenistan team Ahal FC mikhual tawhin si khat faiin an tlawm a, hei hi chhiar zui a ni dawn lo.
Season liam ta pawh khan hetiang harsatna hi Mohun Bagan-in an tawk tawh a, Tractor SC tlawha inkhel tur an nih laiin Iran-ah politic avanga buaina a thlen avangin player-te himna chungchangah hlauhthawn an nei a, zin duh lovin Asia khawmualpui club inelna sang ber dawttu atangin an lo inhnukdawk tawh a ni.
Kolkata club lianin an sawi dan chuan player zawng zawng leh staff hrang hrangte an inrawn khawm a, Iran-a inkhel turin zin loh mai ni se tiin thutlukna an siam a ni.