Zirlaiten kumtin an dil a, an dawn thin scholarship sem theih lohin a awm char char a, zirlai tam tak an mangang ta.
Mahni inchawm a, mi inluah chunga zirna kalpui tam tak an awm a, heng mite tan ngat phei hi chuan scholarship hi an innghahna ve ngawih ngawih a nih bakah an hma hun thui tak hriltu a nihna chen a awm.
Zirlaite an mangang a, tunah hian kum 2023-2024 bakah 2024-2025 financial year chhunga scholarship la dawng lo zirlai tam tak an awm ta. An mangang a, tih vak dan a awm si lo. Sorkar hian hnaa a neih a, an ngaihtuahsak thuai thuai a va ngai tawh em.
Thalaite khawvelah kan cheng tawh a, thalaite hian engkim an thununna khawvel a ni mek. Ram hrang hrang dinhmun pawh thlir ila thalaite thawm a na tawh hle. Chutiang chu kan ram ngei pawhin kan tawn mek a ni.
Tuna kan zirlai/thalai tha za rualte manganna leh harsatna hi sorkar pawh hian a sutkiansak vat vat a tul a, chuti a nih loh chuan kan thalai/zirlaite authawm hi a na viau thei tlat. Zirlai pawl a ni emaw, kan zirna kaihhnawih eng pawl pawl emaw an chet chuan a mualpho tur chu sorkar tho a ni. Chuvangin, sorkar hian ngaihtuah ran leh ngaih pawimawhah nei mawlh se la, vawiin atang hian pek chhuah a nih thuai theih nan thapui thawh mawlh teh se.