Aizawl: MPCC Adviser Zodintluanga Ralte chuan ZPM-in MLA an neih belh leh chuan inluling a, inti lal tur an tam phah dawn tih a sawi.
Dampa biala Congress party tana campaign-a khaw hrang hrang a tlawhnaah Zodintluanga Ralte chuan, by-election a ruling party vote kher hi mipui bat a ni lo tih sawiin, “Dampa bial mipuite hian ZPM candidate lo thlang tling pawh nise, tuna an sorkar, kum 2028 a tla zui ngei ngei tawh tur hi a nihna tur angin a thi beh pha chin an inrem khat vek tawh a, MLA thar tan dinhmun tha emaw, dinhmun duhawm emaw inpek tur an nei tawh lo. Chumi piah lamah MLA an neih belh leh chuan a inluling a, inti lal tur an tam phah mai mai tawh a ni,” a ti.
AIACC National executive member ni bawk Zodintluanga Ralte chuan Dampa bial chu hnam hrang hrang inchenpawlhna a nih avangin, bialtu MLA chak leh thothang tha, tawnhriat ngah tawh a mamawh a, chu mamawh chhanna chu INC candidate John Rotluangliana-ah hian a awm vek tih a sawi a. Dampa bial mipuite’n ngun taka by-election lo awm tur chu an thlir a tul thu a sawi a. Dampa Bial tan hian Congress candidate vote mai hi a thain a him ber tih a sawi bawk.
ZPM sorkar chu a bilh atangin a tho lo laklawh tawh nia sawiin Zodintluanga Ralte chuan, “An pu berin a duh duh a sawi a, Assembly House ah ngei kan police te an thlamuanpui tlak loh, kut vung ber bur, ke vung ber bur tia a sawi ngei te kha opposition leader sawi te a ti leh vel mai mai a ni,” tiin, ZPM chu party hrang hrang atanga lungawilo kalkhawm an nih miau avangin an party chhungah kalphung thar tia an sawi, an kalpui duhdan a danglam nuai avangin Mizo mipuiin an tuar mek tih a sawi.