Aizawl: MNF chuan ZPM sorkar chu a thlakna tur rilru mipuiin an ngaihtuah a, MNF sorkar thlakhlelh letna an pu chho mek tih an sawi.
Thawhlehnia an thuchhuahah MNF chuan, ZPM sorkar chu mipui rapbet a, sawrfuah puhin, mipuite hnen atangin chhiah chi tinreng an lakna chuan mipuite phur tiritin, Zoram mipuiin an kalsan mek zel tih an sawi.
MNF chuan Chief minister-in a thlang tlingtu mipuite laka a inhrosak chuan duhsak taka thlangtute rilru a tihliam chho zel a, an hliam thawidam aiin a punlun zawngin vauna leh tawngkam chhe tak tak leh thudikhlel an dawng zui zel nia sawiin, he’ng hi Zoram mipuiten an ning takzet tawh tih an sawi.
MNF chuan kum hnih pawh la hmang tlinglo ZPM sorkar chu a thlakna tur rilru mipuiten an ngaihtuah tih sawiin, “Ei leh bara hnianghnarna leh mipui mamawh tinreng ngaipawimawha theihtawp chhuah thin, mite ber pawhin kan mamawh kawngpui tha siam a, tuaihnum thintu MNF sorkar thlakhlelh letna an pu chho tan mek a ni,” tih sawiin, tun hnaia Phunchawng Local Council by-election-ah mipui kutthlakna lo langah MNF chuan hneh takin sorkarna an la tih an sawi.
ZPM sorkar chu Mizo hnam leh ram himna aia pumpuarna leh lan ropui tumna dah hmasa a, mahni ram neihchhun pawh dahkham hreh lohah puhin, hniam lam panin, an thusawi pawhin mi nuih a tiza chho zel tih an sawi a. Ram himna sadai thiat mektu ZPM sorkar kalphung hnawl a nih thuaina turin theihtawp a chhuah zel dawn tih an sawi bawk.