Cricket hmanga hmeichhe team te inelna lian ICC Women’s World Cup 2025 chu September ni 30, Thawhlehni khan Guwahati a Aca Stadium ah khelh ṭan a ni a. Inkhel hmuhnawm taka India in Sri Lanka an hneh nghal.
Aca Stadium a mipui pung khawm ṭhahnem tak hmaah India in bul an tan tha lova, India in nghahna Smriti Mandhana chu run 7 lek siamin a out nghal. Smriti a out hnuin India an buai zui a, run an siam hlei thei lo. Ruah surin a tihbuai hnuin India an buai leh zual a, an out zawn zawt zawt. India tana ball vawtute an out zawn vangin Sri Lanka nula te an phur a, an khingpuite an ngamin, an hual zim hneh hle. Sri Lanka in an nawr tawm nasat em vangin India hi an tlawm ngei a rinawm hman hle a, Aca Stadium a mipui sing hnih chuang pungkhawm te an ngui nghuai.
Dinhmun chhe taka an din hnuin India tan chhanhimtu Amanjot Kaur a lo lang. Deepti Sharma nena inkawp fuh tak Amanjot hian ball 56 a hmachhawn aṭangin run 57 lai a siam a, half century a puitlin. Amanjot kawppui fuh tak Deepti Sharma pawhin run 47 lai a siam ve bawk a. An ni pahnih ding dun hian run 103 lai an siam a, India an vawrh kang dawrh. Ruah surin a tihbuai vanga over 47 a inings pawh tawi takah hian India in over 47 ah run 269 siamin mi pariat an out a, Sri Lanka tan target hautak an hnutchhiah. India run siam zat hi ennawn leh a nih hnuin run 271 ah tihsan a ni a, Sri Lanka tan target a hautak phah leh zual.
Sri Lanka vuak hun a thleng a, an tum angin an khel ṭha thei bik lo. Sri Lanka tana run siam hnem ber 82-1 but skipper Chamari Athapanththu chuan ball 47 aṭangin run 43 a siam. Sri Lanka hi over 45.4 ah an out vek a, run 211 bak an siam thei lo. Ruah surin ṭum hnih ngawt a tihbuai inkhel hmuhnawm tak chu a tawp a, India chuan inelna a inthlenṭawmpui Sri Lanka chu run 59 in an hneh ta a ni.
Guwahati khawpuiin World Cup a thleng hian hlut a hlawh hle a, Aca Stadium a India leh Sri Lanka te inkhel hi a hmunah mi 22,843 zetin an en a. Hei hi hmeichhe World Cup, group stage a hmuna entu tam ber ṭum a ni.
Guwahati ah ropui taka hawn tan ICC Women’s World Cup 2025 hi hmeichhe World Cup vawi 13 na a ni a. World Cup 2025 hi India leh Sri Lanka ten an inthlen ṭawm. India hian he inelna lian hi a vawi li thlenna a ni a, Sri Lanka hian an vawi khat thlena a ni ve thung. ICC Women’s World Cup ah hian Australia chu vawi sarih champion tawhin, champion ngun ber an ni a, champion lai an ni tel bawk. Champion lai Australia hian nilaini hian New Zealand hmachhawnin bul an ṭan ang.
Aca Studium, Guwahati a ICC Women’s World Cup 2025 hawnna hun leh match hmasa bera India leh Sri Lanka te inkhel hi Mizoram a Sport ziaktu thenkhat ten a hmunah an en a. Sport ziaktute hi Cricket Association of Mizoram (CAM) te ruahmanna kal te an ni.