Aizawl: Congress thupuangtu, Dr. Lallianchhunga chuan May, 2025-a zo tawh tura tih, Sakawrtuichhun tawntirh, Zihnghalkawn atanga BSF camp bul thlenga departmental work-a kawngpui siam mek tun thlenga zawh a la ni lo chu hriatthiam harsa a tih thu leh kawng hmangtu mipui zah lohna a nih thu a sawi.
Dr. Lallianchhunga hian Ningani khan kawng hi tlawhin April thlaa Aizawl West I MLA, Adviser to Chief Minister TBC Lalvenchhunga’n a tlawh tumin zawh hun tur an party thuchhuahah tar lan a nih thu leh hna 60% thawh tawh niin an sawi tih a sawi.
“Mipuiten beiseina sang tak nena an nghah mek laiin, kumin June thla vel atang khan hna chawlhsan a ni a. Km khat vel chauh siam hmabak a awm a. December, 2024 atanga tan tawh, km 3.5 vel lek heti khawpa rei thawh a ni hi mipui zah lohna a nih bakah hna inpek danah thil felhlel a awmzia tichiangtu a ni,” a ti.
Hna inpek dan sawiin MPCC thupuangtu chuan, “ZPM sorkar tirin kawng siam hna hi restricted tender-a pek an tum a, hetioanga hna inpek hi eptu party an nih lai khan na takin an sawisel a; Pu Lianhmingthanga’n ti lo hram tura a ngen avangin an cancel a. Open tender-a an tih tur thu pawh March 9, 2024 khan Assembly House-ah chief minister-in a sawi chhuak hial,” a ti.
Hetiang hi chief minister thutlukna ni mah se General Financial Rules leh PWD Manual bawhchhiain ZPM block president leh ZPM PAC member, contractor pawh ni lo, Vanchunglura, Sairang chu departmental work-in an thawhtir leh si niin a sawi.
“A siamna senso hi nuai 300 chuang a ni a, departmental work-a inthawhtirna hna lian ber a ni hial ang,” a ti a. Hei vang hian Congress thalai pawhin kawng pawimawh leh pawisa tam tak senna tur a nih avangin tha taka siam a nih theih nan hnathawktute chu Febuary thla khan kawmin an lo sawipui tawh niin a sawi.