Aizawl: BJP Mizoram chuan Ningani khan ‘SEVA PAKHWADA’ (Intellectual Meet) a buatsaih a, Prof Dr. James LT Thanga, MZU, leh PC Lawmkunga, IAS (Retd) te chu speaker an ni.
Prof James LT Thanga chuan ‘Viksit Bharat, GST Reforms, Ease Of Doing Business’ tih thupui hmanga thu sawiin India ram hun kal tawha tax lak dan leh GST lak dan chungchang te, Viksit Bharat 2047 thlenna tur atana India inbuatsaihna chungchang te, tun huna dinhmun mek leh ‘Ease of Doing Business’ chungchanga India hmalaknate a sawi fiah.
“India-ah hmasawnna kan neih theih nana pawimawh em em mai, ‘game changer’ lian bera ka ngaih chu system dika kal a ni a, system dika kan kal hian hmasawnna a lo thleng thini,” a ti.
PC Lawmkunga chuan Atmanirbhar Bharat chungchang sawiin, “British-in India ram min awp laiin, East India Company-tena India hmangaihna nei miah lova min awpna lak atanga hnawhchhuah hi India mipui khan kan duh a, 1947-ah kan hmu a, chutihlaiin British-ho khan India hnenah ram tan thil tha hnutchhiah mumal a nei lo va, rêl kawng hi min hnutchhiah an neih pawimawh zingah a chhawrna awm ber a ni,” a ti.
Lawmkunga chuan India hi khawvela ram thang chak leh hmasawn ber pawl a ni ta a, Prime Minister Narendra Modi-a sorkar hnuah phei chuan ‘Atmanirbhar Bharat’ tih thupui hmangin mahnia intodelhna kawngah nasa takin ke a pen thu a sawi.
Lawmkunga chuan, “India ram chu khawvelah nuclear power nei ram zingah kan tel a, India ram siam ngei missile-te leh ralthuam dangah pawh khawvelah kan hniam lohzia leh kan ralthuam siam ngei a chhuanawm zia pawh kan hmu tawh,” a ti.
Education system, agriculture, buh leh wheet leh bawnghnuteah pawh intodelh a ni tawh a, kawng tam takah intodelh mek a ni a, hma sawn zel a ni tih a sawi bawk.
Inkhawmah hian zawhna leh chhanna leh sawihona hun hman a ni bawk.