Liverpool manager Arne Slot chuan Diogo Jota chu thi tawh mah se kum hnih chhung contract la nei a nih avangin a hlawh chu kim thlapin Liverpool neituten an pe dawn tih a sawi.
Portugal striker hi July 3 khan a unaupa, Andre Silva nen car chesualah an thi a. A thih hma ni 11 khan fa pathum a neihna, hun rei tak a lo kawp tawh, Rute Cardoso nen an innei.
Jota thih hnuah thu thang neuh neuh a awm a, Portugal-a an sawi dan chuan Fenway Sports Group chuan a contract neih ang taka a hlawh tur pawh a kalsan tak a chhungte chhawmdawlna atan an pe kim vek dawn an ti a. 2026-27 thleng contract a nei a, Slot chuan thu thang chu a dik a ni tih a sawi a ni.
Slot chuan, “Liverpool neitute hi an fakawm a. Thil an kalpui dan hi a tha ka ti a, kan club tantute rilru put hmang pawh chhuanawm ka ti hle,” a ti.
“Club neitute chuan Jota nupui fanaute chu contract a lo ziah tawh a hlawh tur an pe kim dawn a. Mi tam tak chuan hei hi thil nih dan tur ve hrim hrim emaw an ti mai thei a, a ni miah lo a, football khawvelah hi chuan thil hi a danglam fo thin,” a ti bawk.