Aizawl: F. Rodingliana, Minister of State chuan Ningani khan Lianchhiari Run, I&PR Office, Treasury Square-ah Mizoram buai chungchang ziahna, ‘Vangvat Kai Lo’ (The Forgotten Brigades) tih lehkhabu, Commr. Lalkiamlova ziah a tlangzarh.
F. Rodingliana chuan silai kenga martarte an hlut rualin in lama ram tana martar mi tam tak, hriat hlawh lo takte tlangzarh an ni chu lawmawm a tih thu a sawi.
“Kan ramin independence kan sual laia nun chân tam takte hriat loha tuboh leh dolung inkara thawktute puanzarna hun a awm hi a lawmawm,” a ti.
Independence chu a hlu a, economical independence neih a pawimawh thu leh chumi tura power lamah intodelh a tulzia sawiin, hemia hma sawn ngei theih nana tawngtainaa hre reng turin kalkhawmte a sawm.
Lehkhabu ziaktu, Commr. Lalkiamlova chuan ram buai lai chanchin ziahnaah ralthuam kenga rammute chanchin chhiar tur a awm nual a, heng ho lo pui tura ralthuam keng ve lem lo MNV-te chanchin dai mai tur chu thangtharten an hriat reng theih nana ziak a nih thu a sawi.
Rev. Zosangliana Colney chuan lehkhabu tlangzarh thlirlawkna hun hmangin lehkhabu chhiar nuam tak, ngaihnawm leh bengvarthlak tak mai hi hnam tan rohlu a tling dawn a ni tih a sawi a, a kawm leh a printing chungchangah lehkhabu tha leh hetiang lama tui mite tan chuan neih ve ngei chi niin a sawi.
Lehkhabu hi pakhat Rs. 200-a lei theih a ni.