Aizawl: Mizoram puma Diocese Catholic Thalai Pawl chuan nimin khan Thalaite Ni an hmang a. He ni hi cultural day atan hman niin, Mizoram hmun hrang hrangah a lawmna programme neih a ni.
City Parish lam pawhin he ni hi Cultural Day atan hmangin, hnam thuam a inthuam niah an hmang a. St. Lawrence Parish, Ramthar Vengah Aizawl huam chhunga Parish hrang hrang thalaiten Mass leh Fellowship programme an nei a. Aizawl huam chhunga Catholic thalai member tel thahnem hle a.
Chawhmaah Mass Thianghlim neih niin, chawhnuah fellowship programme an hmang chhunzawm a. Diocese Youth Director Rev Fr James Lalruattluanga’n Thalaite Ni thuchah a sawi a, Diocese zaipawl an zai bawk.
Inrinni khan he ni pual hian thisen pek runpui an lo nei tawh bawk.
Kum 2005 atangin he ni hi hman tan a ni a, thalaite intawh khawm nan leh thalaite zingah hmasawnna atana thil pawimawh inhrilhna atan hman thin a ni a. Hemi ni denchhen hian kum eng emaw chen chu damdawi in hrang hranga hman turin thisen pek runpui lo neih tawh thin a ni.