Khatia actor Ranbir Kapoor nen an inneih tak hnu khan fanu pekin an awm a, lemchan lam pawh an la hawi dun nasa thei meuh lo. Mahse, an hlimna leh lawmna erawh a zual tulh tulh thung si.
Alia Bhatt chu tunhnai khan Twinkle Khanna leh Kajol te talk show-na hmunah inlan vein, fa neih hnu nunphung chungchang zawhna te chu hlim leh phur takin a sawi chhuak.
Naute han neih meuh chuan darkar tam duh thalin a mut theih tawh loh a, i harh duh hun lovah pawh a kaitho ang che. Mahse, thil hrehawm erawh a ni si lo, tiin Alia Bhatt chuan a sawi.
A sawi zel danin, ‘Mut hi ka ngaina a, ka chawlh hahdam hun a nih miau avangin am taka mut pawh ka duh thin. Chuvang chuan a hma anga menrei ang kha ka thei tawh lo. Zan dar 9:30 vela mutthilh mai chang ka ngah ta hle. Kan pa (Ranbir) hian kan mut fel hnu hi a lo nghak thin bawk a, kan tan chuan pa tha tak a ni. Naute a harh tawh erawh chuan kan tho a, kan pa hian min support tha hle, kan tan hian a mu mang ngai lo hial zawk a ni,’ a ti.
Nau a neih hnuah a taksa inthlak danglamin, ngai a la awh hlei thei meuh lo niin a sawi a, mahse a nunphung leh harsatna lian tham inthlak erawh a la awm lo a ti bawk a, naute an neih hnu chuan an nupa khawvel chu nitin a nuam thar veng veng thung niin Alia Bhatt chuan a sawi bawk.