Tunlaiin Mizoram chhunga sumdawnna kawng hrang hrangah tunhma atanga kan duh loh hnamdang dawrkai an pung chak hle a. Ram neitute tana hnawk tham an ni tawh. Mizote aiin an hausa a, sumdawn an thiam a. Keini aiin sumdawnna lama zawmpui tur vairam lamah an nei nghet bawk. Dawr tam tak hi chu ram pawn atanga vai mihausa ten an sumdawnna huang an rawn zauhna niin a lang. Mizoram chu mizote ta a ni kan lo tih, kan thinlunga kan vawn tlat chu an rawn su darh nasa ta khawp mai. Hnam tlem keini mizote ang tan chuan chimralna lamtluang an rawn zawh mup mup ni berin a lang.
Hnamdangte dawr luahtir loh kan han tih thinte lah chu tute emaw sum duh lutukin vai thurualpuiin sum hmuh nan an hming an lo hman tir zel si. CYMA meuh tan pawh hnamdang dawr siam tir loh tih chu hmalakna khirh a ni ta. Vai dawr nia lang ngei pawh a neitu va enchiang ila mizo hming a lo awm zel si. Kar kalta khan Aizawl Chhinga veng chuan an veng chhunga dawr awmte a neitu dik tak an zawngchhuak hlawm a. Mahse, dan ang tak chuan India khua leh tui an nih si a, ILP an neih thlap chuan han nawr haw ngawt a remchang kher lovang.
Kan ramah hian hetianga hnamdang sumdawngte hi an pun zel chuan kan hmabak chu a lang sa reng mai a. Kum 20 te a ral leh chuan kiltinah vai an phu suau suau tawh ang a. A ram neitute hi thinur em em in, tih leh ngaihna hre lovin kan ral riai riai mai dawn a ni. Tunah hian chutiang hun a lo thlen loh nan a dan ang zawng chuan tih theih kan nei tlem em em tawh a. Heng vai dawr lo pung chho lakah hian engnge kan tih ang.
India ramah kan awm a, India dan lahin a phal zau nasa mai si. Chuvangin ral ai chuan kan thiam dan dana kan chet ve hi a ngai ni ta berin a lang. Khawvela hnam ral ta tam tak hi inti rilru zau, midangte ngai thei an ni zel. Europe ram inti rilru zau, hnamdang lalut nasa ho pawh an buai mek a. Keini hnam tlemte hian kan rilru kan ti zau ve ngam dawn em ni. Rilru zau taka ral kan duh chuan kan thu a ni a.
Mizo hnam hi la awm zel se, he hnam hian ropui takin hmalam hunah thangtharte tan ram i buatsaih ang kan ti anih chuan, rilru zau huau loh hi pawi kan ti tur a ni lovang. Rilru zim, ramdang mite luh tam hlau em em, racist tia an puh Poland chuan Europe ram dangin pawn lam chim buaina avanga harsatna an tawh luih luih laiin an ram an veng him a. Tunah hian khawvel ram ropui ni turin hma an sawn mup mup mek a ni. Zofaten Poland ram i entawn ang u. Dan in hnam himna min pek si loh chuan kan thiam dana kan tih ve a ngai a ni ta ber e. Mahni ram venhim hi mihring kan nihna anga kan right a ni.