Aizawl: Mamit District Oilpalm Farmers Association-in kawngpui chhia avangin an oilpalm thar an hralh thei lo tih an sawi a, an harsatna an tawh mek chu sutkian dan ngaihtuahpui turin Mamit Addl. DC, Carolyn LB. Khiangte leh PWD National Highway Division-I EE, David PC Lalrinliana an ngen.
Mamit District Oilpalm Farmers Association hruaitute chuan kawngpui chhia vangin an oilpalm thar leisaktu, Godrej Agrovet Ltd. Company-in an leisak thei tawh dawn rih lo tih an sawi a. Nikumah pawh kawngpui chhiat vangin hun rei tak chhung an lo hralh thei tawh lo tih sawiin an mangang thu hi chief minister leh agriculture minister hnenah thlen mah se, tun thlengin chak zawka hmalakna hmuh tur a awm chuang lo chu a lung chhiatthlak an tih thu an sawi.
Tunah hian Mamit district chhungah oilpalm chingtu chhungkaw 400 chuang an awm mek a. Sorkar kum liamta 2023-24 chhung khan metric ton 4,141.681 an thar a, sorkar kum kal mekah metric ton 3,494.991 an thar tawh a, kawngpui chhia vanga an lo thei lo reng a nih chuan thla khat chhungin metric ton 200 atanga 300 vel an hralh thei dawn lo va, hei hi Rs nuai 30 atanga Rs nuai 40 man vel a ni tih an sawi.