Mizo Idol top-50 te chuan kar hmasa chhung khan intihsiakna neih chhunzawmin, an zing atang hian top-20 thlan chhuah an ni a, top 20 result hi inrinni zan khan puan a ni.
Top-20 a tlingte hian tunkar ningani leh zirtawpni (October ni 9&10) zanah te intihsiakna an nei chhunzawm leh nghal dawn a, zan khatna leh zan hnihnaah hian an zai vek dawn bakah, mizo hla pahnih sa in, vawi hnih an zai tawh dawn a ni.
Top-20 a an hla sak atanga viewers ngah ber chu top-10 a lut nghal tur niin, heng viewers te hi Zonet youtube channel, instagram leh facebook atanga teh leh en tur a ni bawk.
Top-20 inelnaah hian acoustic guitar, cajon leh keyboard an chhawp leh dawn a, mahni mamawh ang zaithiamten an hmang thei dawn a, Mizo Idol hian ngaihhlut a hlawh telh telh bawk a ni.
Tarlan tawh thin angin Mizo Idol, 2025 a thlan chhuah chuan cheng nuai 2 a dawn dawn bakah LBS Suzuki atangin Scooty a dawng tel dawn a, pahnihnain cheng nuai 1 leh pathumnain cheng sing 5 a dawng dawn a ni.