Home Minister K Sapdanga’n Mizoram hmun hrang hranga ruihhlo do beihpui an thlak mekah, Assam leh Mizoram inrinnaah pawh hmalak tum a nih thu a sawi.
Inrinni khan Home Minister K Sapdanga leh Excise Minister Lalnghinglova Hmar te chu Mizoram House, Silchar-ah Silchar Branch YMA hruaituten an kawm a. YMA hruaitute chuan kumin chhungin Mizo hnam harsatna hrang hrang leh ruang buaipuiin vawi 60 chuang an che chhuak tawh a, heng avangte hian bungraw dahna tur an mamawh thu te, ramri hnaiha awm an nih avangin ramri buaia tlanchhiatna tur leh mipui humhimna tur hall an mamawh thu an lo thlen.
Silchar Branch YMA member hi 400 vel an ni a, an hruaitute chuan ministry dangah pawh hmalak an lo tiam tawh thu leh a hmunhma pawh an enhopui thin thu an sawi a, a hlawhtlinna hmel an la hmu lo chu hrehawm an tiin tun sorkarah beiseina sang tak an neih thu an lo sawi.
Hei bakah Mizoram atangin sumdawng hmelhriat nei inti, phone atanga Silchar mi thianah siama ralkhat atanga pawisa inthawn, bungrua dawng si lo thubuai chungchang chu an buaipui tam ber thu a nih thu an sawi a. Mihring inruk bo hial pawh thleng tawhin tun dinhmunah ruihhlo kaihnawihah Silchar Jail-ah Mizo 58 an tan mek thu an sawi bawk.
Silchar Mizoram House-a thawktute pawhin Mizoram Police, Silchar-a thawktuten silai an kawl ngai loh thu leh police hmalakna kawngah a thuanawp thu an lo thlen a, police-te hian office an neih loh avanga a buaithlak thu an sawi bawk.
Home minister chuan Silchar Branch YMA hruaitute thil thlen chu a tul anga bawhzui a nih tur thu a hrilh.
Silchar Mizoram House chungchangah UD&PA minister ni bawk, K Sapdanga chuan Silchar Mizoram House-ah hian SASCI atangin in sak belh a ni dawn a, police duty post pawh a tel theih ngei a beisei thu a sawi a. Silchar-a MST bus station hlui chu ramri hung that leh lei chhun khah tha a tih thu a sawi a, house hmar lama ram awl chu tangkai zawka hman a nih theihna turin Silchar Mizoram House DRC, Lalhmingliana chu a tul anga lo bawhzui a, proposal siam turin a ti.
Home minister chuan, “Ruihhlo do beihpui kan thlak mek a, Mizoram leh Burma inrina khaw 22-ah branch YMA kan ngen a, anni nena thawkhovin heng khuaahte hian police kan dah vek a, tunah chuan Aizawlah pawh ruihhlo a to sawt hlein kan hria, Assam nen kan inrinaah pawh hmalak tum a ni bawk,” a ti bawk.