Madhya Pradesh-a thuneitute chuan Chhindwara district-a khuh damdawi thianghlim lo ei avanga naupang 14 an thi nia hriat a nih hnuah a petu doctor an man.
Doctor hi Praveen Soni-a a ni a. Coldrif syrup hi naupang tam tak hnenah a chawh a, a tam zawk hi Parasia-a a clinic-ah niin news agency PTI chuan a tar lang.
Police chuan Tamil Nadu–a damdawi siamtu lakah thubuai an siam bawk.
Madhya Pradesh police hian Pathianni tuk khan Parasia Police Station, Chhindwara district-ah Sresan Pharmaceuticals, Tamil Nadu leh tual chhung naupang doctor (paediatrician) lakah hian thubuai an ziak lut a ni.
Coldrif cough syrup hi Sresan Pharmaceutical-in an siam niin Parasia, Chhindwara district-a naupang 11 thih chhan bera ngaih a ni tih Superintendent of Police Ajay Pandey chuan thuthar lakhawmtute a hrilh.
Complaint thehluhah kum nga hnuai lam eng emaw zat chu khuh damdawi an ei hnuah an thi a, laboratory-a endiknaah chuan thil khang tihtui nan leh khawl tihdin nana hman thin tui bawlhlo hlauhawm tak, diethylene glycol (DEG) a tel nia hmuh a ni.
Chhindwara District Collector Sheelendra Singh chuan biopsy report atanga a lan dan chuan naupangte hi khuh damdawi an eia DEG tel vanga thi ni ngeia a lan thu an sawi.
Madhya Pradesh sorkar chuan an state pumah naupang pakua an thih hnuah Coldrif cough syrup hralh chhuah hi an khap nghal a, heng mite hi an kal a khawih chhia ni ngeia hriat a ni.
“Diethylene glycol hi phal chin tel tur 0.1% a nih laiin 48% chuang Coldrif-ah hian a awm a, a tel tam dan hi hlauhawm tak a ni,” tiin drug controller DK Maurya chuan a sawi.
“Damdawi hi Chhindwara-ah chauh hian hralh chhuah nia hriat a ni a, district dangah hmuh a ni ve lo va; mahse, drug inspector zawng zawngte chu lo ngaihven tura tih an ni,” tiin Maurya chuan a sawi a. Damdawi rinhlelhawm dang, Nexa DS endikna report an ngaichang mek tih a sawi bawk.
Tamil Nadu sorkar pawhin Coldrif cough syrup hi October 1 atang khan an state pumah hralh a khap mek bawk.