Aizawl: Sports Minister Lalnghinglova Hmar-in Inrinni khan Kolasib Saidan-a Regional Sports Training Centre (RSTC) a tlawh.
RSTC, Saidan hi Sports & Youth Services Department hnuai niin, mipa naupang kum 17 chin hnuailam tana football zirna (residential academy) a ni a, DSYO leh coach-in an awmchilh a ni. Tun dinhmunah naupang 30 an awm mek.
Kumin May khan Bihar-a Khelo India Youth Games-ah Mizoram aiawha kalin Bronze medal an la a. September, 2025 a Subroto U-17 Boys khelh zawh takah khan player damlo awm nual chungin semi final an thleng bawk a ni.
RSTC, Kolasib-ah hian Minister hi Warden Zonunmawia leh Kolasib-a SYS thawktuten an lo dawngsawng a ni.
Sports Minister Lalnghinglova Hmar hian Inrinni vek khan Kolasib District Football Association leh Reliance Foundation-in Kolasib District Stadium-a Naupang League an khelh mek a tlawh a, naupangte chu football hmanga nun dik zir tel tur leh tun atanga zu leh ruihhlo tichhin lo tura thutlukna nghet siam turin a chah.