Pathianni khan Typhoon Matmo-in China chhim lam a nuai niin sorkar thuthar puangtuin a sawi a. Chawlh an hman hun lun lai tak ni mah se Hainan thliarkar province-ah chuan a hmain thlawhna thlawk leh thil tihkhawm tura ruahman tam tak an lo thulh lawk tawh a ni.
Matmo hian kar hmasa khan Philippines-ah tui nasa takin a lo tilian tawh a, China-ah hian Guangdong province khawchhak lam tuipui kam, Xuwen-ah an ram huna chawhnu dar 02:50 (India-a chhun dar 12:20) velah tuipui atangin khawmual a kai a ni.
China-a vaukam a pana a thlen lai vel hian thlipui darkar khata km 151-a chak a keng niin an ram meteorological centre chuan a awi.
Typhoon thlen hun hi Nilainia ni riat chhung National Day chawlh an hman tan tur hma lawk a ni a, hetih hun lai vel hi mi tluklehdingawn 2.36 vel zin veivak an awm hun lai tur nia chhut lawk a ni tih sorkar thupuanna chuan a tar lang.
Inrinni zan atang khan Matmo-in thli na tak leh ruah tam tak keng tura ngaih a nih avangin khualzin tamna, Hainan-ah hian thlawhna leh lawng service tihtawp lailawk a lo ni tawh.