South Korea sorkar chuan ramchhunga mahni intihhlumna a ziaawm deuh theih nan internet-a hetiang sawimawina chu chik lehzual enfiah tur team a ruat tawh a. Member 100 awmna ah hian zirlai, chhungkaw hotunu te leh rilru lama specialist te thlengin an tel.
Ram changkang zinga chhiar hmaih hauh loh tur, South Korea hi mahni intihhlum hluar ber ramte zinga mi a ni mek a, nitin mi 40 vel intihhlum ang an ni a, an ngaihtuah awm hle. Internet-a thil tha lo leh pawi thei te chu a kaikuang lian takah sorkar hian a ngai tawh a ni.
Sorkar-in a din team hian internet-a blog te leh social media (facebook, X adt.) chu uluk taka enfiah thinin, mahni intihhlum sawimawina leh chawilarna te thurchhuak a, chak taka bawhzui an tum thin ang.
Seoul khawpuia sorkar thupuangtu-in, ‘Yonhap’ news agency a hrilh danin, mahnia intihhlum hi mimal tin te harsatna a ni tawh lova, social issue lian tak a tlin tawh avangin mi nawlpui anga chinfel ngai chi a ni tawh a ti.
Report-a a lan danin, tunhma zawng aiin ramchhunga intihhlumna hi a let 5 zetin a pung a, mithiamte chhut danin, zirna chungchanga kil hrang hranga nawrna nasa tak (pressure) hi mi tam takin an zo lo niin an ngai tawh nghe nghe a, hetia an sawi theihna chhan chu intihlum tam zawk hi zirlaite an nih vang a ni.
Thuneitute chuan Seoul khawpuia hmun lun lai leh puipunna hmun angah te rikrum thila tanpui theihna tur number an dah tawh a, lei (bridge) lian zualah te dah a ni bawk a, Han luipui suar tluanin venhimna thawk tu te’n patrolling ngawrh takin an nei thin.