Election Commission of India chuan nimin tlar dar 5 khan India ram state hrang hranga inthlan leh by-election neih hun tur a puang a, Dampa bial by-election neih hun atan November 11, 2025 ruat a ni.
Dampa Assembly Constituency by-election hi Jharkhand, Punjab leh Telegana-a inthlanna neih tur ruala neih tur a ni a, Mizoram leh heng state pathuma inthlan result hi November 14, 2025-a puan tura ruahman a ni.
October 13, 2025 hian Mizoram State Election Commission chuan inthlan chungchanga hriat tur pawimawh thuchhuah a siam ang a, October 21, 2025 thleng nomination file theih a ni a, a tuk, October 22, 2025 hian hming pe lutte hi endik a ni ang a. October 24, 2025 thleng inhnuhdawhna hun hawn a ni.
Dampa bial by-election neih tur chungchanga Thawhtanni tlai dar 5-a Chief Electoral Officer (CEO) Dr. Lalrozama’n MINECO-a a pisa-a thu thar thehdarhtute a kawmnaa tar lan a nih danin, Model Code of Conduct pawh inthlan puan rual hian hman tan nghal a ni.
Electoral roll siam that hnuhnung ber, September 30, 2025-a tihchhuahah Dampa bialah hian vote nei 20,790 (mipa 10,605 leh hmeichhia 10,185) bakah service voter 115 an awm a. Polling station 41 awmin Silsury I Polling Station-ah voter 1,103 awmin an tam ber a, voter tlem berna polling station chu Zopui Polling Station a ni a, voter 30 an awm a ni.
Pink Polling Station pahnih a awm dawn a, Critical Polling Station pathum (Silsury I, Silsury II & Silsury III) a awm a, heng polling station-te hi CAPF section thumin an veng dawn a ni.