AZL: BJP Mizoram President Dr K Beichhua, MLA chuan BJP chu hlauh tur ni lovin ram hmasawnna atan thlawp tlat a ngai tawh zawk tih a sawi.
Thawhtannia BJP Mizoramin an pisaa inkhawm BJP president chuan Prime Minister Narendra Modi kaihhruaina hnuaiah social security-ah nasa takin India chu a thang a, hmasawnna avangin ram dang pawhin India an ngaihsan phah tawh a, PM Scheme hrang hrangte a huap zoin a fun kim a, kum upa leh pianphunga rualbanlote thlengin he social security hian a huam vek tih a sawi.
Siaha bialtu MLA ni bawk chuan PMAY (Housing for All) te, PM Kisan te, Healthcare Insurance Scheme te, PM Free Electric Connection te, sorkar hnathawk lo chhungkuateah pension scheme te leh Mizorama hman ve loh thlengin scheme tam tak a awm avangin Mizoram mipuiin BJP hi an hlauh chhan tur a awm lo tih sawiin, “Hlauh tur ni lovin, kan ram hmasawnna atana kan thlawp tlat a ngai tawh zawk a ni,” a ti.
Dr K Beichhua chuan Dampa bial by-election lo awm turah bial mipuiten hmasawnna tur ngaihtuah chunga vote an thlak a ngai tih a sawi a. Bial mipuiin an candidate an thlan tlin chuan party bil MLA ni lovin bial MLA a ni dawn a, mipui tana ding a nih dawn avangin an candidate Lalhmingthanga vote theuh turin a sawm.