Aizawl: Land Revenue & Settlement Minister B Lalchhanzova chuan ZPM an sorkar hnuah an department-in hma nasa taka an lak zingah settlement officer-te assistant commissioner (revenue)-a thlak a ni mek a, hei hian revenue administration-ah nghawng tha tak a neih an beisei tih a sawi.
Nimin khan LR&S minister hian MCS probationer-te tan LR&S Directorate Conference Hall-ah Revenue Orientation Training Programme a hawng a. MCS 2025 batch-te hi mi 17 niin kar khat chhung revenue dan leh kalphung bakah ram teh dan kalphung leh office lama hna kalphungte an zir dawn a ni.
Hawnna inkhawmah B Lalchhanzova chuan an sorkar hnuah nasa takin hma an lak thu sawiin, chung zingah settlement officer-te assistant commissioner (revenue)-a thlak a ni mek a, hei hian revenue administration-ah nghawng tha tak a neih an beisei tih a sawi a. DC Office-a sub deputy commissioner zingah SDC (Revenue) designate an tum thu sawiin MCS officer lut tharte chuan service-a an luh tirh phat atangin revenue tawnriat an nei thei tawh tur chu an service zelna tur atana thil pawimawh tak a ni dawn tih a sawi.
MCS officer-te chu an exam laia general studies-a ethics paper chu a taka hman hun a nih thu sawiin B Lalchhanzova chuan, dikna leh rinawmnate kengkawha dawrtu mipuite lakah pawh hawihhawm tak, zahawm sia kalpui thin turin a chah.
Hun hma zawhah B. Lalchhanzova chuan LR&S Video Conference room-ah SVAMITVA Scheme hnuaiah Sesawng VC I, II leh III Property Card te VC kutah a hlan nghal a ni.