Aizawl: MNF President Zoramthanga chuan ZPM chu lal leh thuneihna duh luat avanga ropui thei ang bera inlantira, thiang leh thiang lo pawh pawisa lova thuneihna lekah a puh a. Chief Minister Lalduhoma chu dictatorial power hmanga mi tlem te awpkhawm thang a nih thu a sawi bawk.
Mizo Hnam Run chhung inkhawm Thawhtannia neihah chief minister hlui chuan, Forest Conservation Amendment Act, 2023 (FCAA) dan hi a that leh a chhiat an sawi lo va, Mizoram sorkar thuneihna vawnhim a tul an ti tih sawiin, “He dan kan duh loh chhan tam tak zingah international border atanga km 100 huam chhunga state sorkar rawn lova central-in tul leh pawimawh an tiha kut an thlak thei tur hi a pawi lehzual a. He dan hman kan duh loh thu hi pass kher lo mah ila, Peace Accord (Art. 371 G) hian min humhim sa a. Hei hi a chian lehzual a, kan lo inralrin nan MNF-in kan duh loh thu kan lo pass a, central-ah kan thawn thla nghal,” a ti.
Zoramthanga chuan FCAA chu sorkar laipuiin hmang tura a dil pawh an dil hmain ZPM sorkar chuan dawih aw chhuahin a engamah hmain an lo pawmsak tih a sawi a. Mizo hnam himna humhim ngam sorkar an siam leh ang a, a tawp thlengin an do dawn tih a sawi.
MNF president chuan ZPM chu Absalom-a ang deuh an ni tih sawiin, “Lal leh thuneihna duh luat avanga ropui thei ang bera inlantirin, thiang leh thiang lo pawh pawisa loin thuneihna an lek a. An hotupa Pu Duha hi, mi tlem te, dictatorial power hmanga lo awpkhawm thang a ni a. Kum 40 zet hetianga a lo kal tawh avangin a thanhnan tawh,” a ti bawk.