France chuan ni 26 lek hnua prime minister atanga Sébastien Lecornu-a a bân leh hnuah politic boruak chiri tak an tawng thar leh mek.
MP-ten a budget an thlawp loh avangin François Bayrou-a bângin Lecornu-a hi ruat a ni a. Bayrou-a pawh hi Devember thla maia paih thlak, Michel Barnier-a thlaktu a ni.
Lecornu-a hi Bayrou-a sorkar mi tam zawk a chhawm, a cabinet-in a hma nia an sawisel hnu leh National Assembly-a party hrang hrangten paih thlak tuma an vau hnuah a bâng a ni.
French chanchinbute chuan French President Emmanuel Macron-a chuan sorkar tlu ta chungchangah hian engmah sawi a nei rih dawn lo va, kal zel dan tur a tifel phawt dawn niin an tar lang.
France politic hi July, 2024-a Macron-a’n European Parliament vote-a an party an chak loh hnua sorkarna chelh chhunzawm a duh avanga parliament inthlan a huaihawt atangin a nghet lo hle.
Inthlan result-ah chak bik party an awm lo zui a, ngaihdan inang lo tak pahnihah inthen mah se thawhhona an siam.
Party tam tak chuan inthlan hun tihhma an duh a, thenkhat chuan Macron-a chu bâng mai se an ti a; mahse, kum 2027-a a hun tiam a zawh hma chu bân a tum lo.
“Tuna thil finthlak ber chu inthlan a ni,” tiin National Rally (RN) hruaitu, Marine Le Pen chuan a sawi a. “Fiamthu hi a kal thui ta a, Macron-a hian kan rem hi hun harsa takah min hruai thleng a ni,” a ti.
Macron-a hian engtin nge thil a kalpui dawn hriat a la ni lo va, duhthlan tur pathum a nei a. Prime minister thar a ruat thei a, National Assembly a thiat thei a, amah a bâng thei bawk.
A bân hi a rinawm loh va, a hmasa pahnih hi an kal zui dan tur a nih hmel.
French politic-ah hian inthen darhna a nasat tawh em avangin tu pawh prime minister ni leh se bill reng reng pass turin hmin tur an ngah hle a ngai zel dawn.
Michel Barnier-a chu nikum September thla khan prime minister atan dah niin thla thum hnuah bukna hmanga paih a ni a. A thlaktu, Bayrou-a chu thla kaw hnuah parliament-a inrenchemna tur budget a pharh, sorkar sum sen € tluklehdingawn 44-a tihtlemna tur kaltlangpui zo lovin a tla leh.
France hian kum 2024 chhung khan a hma kuma an ram sum thawh chhuah chu 5.8%-in an phak lo va, an sum thawh chhuah aiin an leiba 114%-in a tam bawk a. Europe-ah Greece leh Italy dawta leiba ngah ber niin mi pakhat zelin €50,000 ba ang an ni.