Aizawl: HIV/AIDS donaa thawh that vanga tun hnaia chawimawina dawngtu Vanlalruati hnenah Mizoram State AIDS Control Society (MSACS) Project Director Dr Jane Rinsangi Ralte chuan Thawhlehni khan MSACS hmingin lawmpuina a hlan.
Vanlalruati hi HIV positive niin, Positive Women Network of Mizoram (PWNM) kaltlangin hun rei tak HIV/AIDS doin hma a la tawh a, a hmalakna avangin We Serve India Forbes India chuan tun hnai khan Women Led Social Innovation Award an hlan a ni.
Lawmpuina hlan inkhawm hi MSACS Project Director pisaah neih niin, MSACS Joint Director (IEC) Zuiliani Hrahsel-in a kaihruai a. MSACS Project Director Dr Jane Rinsangi Ralte chuan HIV/AIDS donaa Vanlalruati hnathawhte chhuanawm a tih thu leh chawimawina a dawng chu a phu hlea a hriat thu a sawi a; MSACS-in an lawmpui tak zet thu a sawi bawk.
Lawmpuina inkhawmah hian Vanlalruati bakah, hmeichhia HIV positive thenkhatte leh PWNM Managing Board hotute pawhin thu an sawi a ni.