Aizawl: New Delhi-a India Mobile Congress (IMC) 2025-a tel tura thang mek, Information & Communication Technology Minister Dr Vanlalthlana chuan nimin khan Union Minister of Electronics and Information Technology Ashwini Vaishnaw chu a pisa-ah a kawm.
ICT Minister Dr Vanlalthlana chuan Mizorama Software Technology Park of India (STPI) changtlung zawka din vat a nih theih nan MeITY Minister chu hma lakpui turin a ngen a. Mizoramin human resource an neih that thu leh digital literacy-a an sanna chu tangkai zawka hman a nih theih dan tur a sawipui a. Rei lo tea Mizoram Engineering College (MEC)-a class tan tura Mizoram sorkar hmalakna leh National Institute of Technology (NIT) Mizoram campus, Lengpuia din tur pawh hun rei tak chhunga chawlh a nih hnuah hna thawh chhunzawm leh thuai a nih tur thu a sawi bawk.
Mizorama IT hub din a nih theih nan leh software export leh IT incubation centre kalpui a nih theih nan STPI changtlung tak chu Mizoram mamawh a nih thu Union Minister of Electronics and Information Technology chu a hrilh bawk.
STPI din dan chungchangah MeITY Minister chuan Mizorama hmunhma awmte a hmuna an en vat tur thu lo hrilhin, a rang hma lakpui theih ngei a beisei thu a sawi.