Aizawl: Larsap General (Dr) Vijay Kumar Singh chuan nimin khan Regional Institute of Paramedical & Nursing S Sciences (RIPANS) 25th Graduation and Lamp Lighting Ceremony, 2025 chu khuallian niin a hmanpui a. Mizoram University Exam 2025-a Gold Medalist-te hnenah medal leh citation a hlan.
RIPANS Auditorium-a hun hmanah larsap chuan graduation day chu thawhrimna leh inpekna lan chhuahna a nih thu leh mite tana rawngbawlna, lainatna leh mawhphurhna lantir tura bultanna a nih thu a sawi a. Zirtir lut tharte chu an hmalam huna an thawh turte chu hna satliah ni lo, mi dang tana malsawmna ni tura rawngbawlna dik tak, lainatna leh ngaihsakna behchhan a ni, a ti a. Zirlaite chu an profession chu eizawnna atan maia hmang lo tur leh, hna thianghlim, midang tana rawngbawlna zahawm leh ngaihsanawm berte zinga mi a ni tih hriaa inpekna nena thawk thin turin a chah.
Larsap chuan Mizoram leh hmarchhak state-a chengte chu mi dik, inthununna tha nei leh khawngaihna ngah mi an nih thu sawiin, heihi nurse leh paramedical profession dang atana India leh ram pawn Healthcare Institution thlenga an duh bikna a ni tih a sawi a. RIPANS zirlaite chu healthcare global ambassador an nih thu sawiin, hmingthatna chu vawnghim zel turin a chah a. Damlote’n an lakah beiseina sang tak an neih avangin rinawmna leh hmangaihna nena hna te ber thlenga tha taka hlen chhuah ngei tum turin a chah bawk.
Inkhawmah hian RIPANS Director Dr. Sanjay D. Sawant pawhin thu a sawi bakah, Proficiency Award dawngtu zirlai 88-te hnenah chawimawina a hlan a. Lalruatkimi Renthlei, Nursing Superintendent, Greenwood Hospital, Aizawlin B.Sc Nursing zirlai tharte pual khawnvar chhitna leh thutiam sawi rual a kaihruai a. Graduate tharte hnenah lawmpuina memento hlan niin thutiam an sawi rual a. Zirlaite atangin thlahna thuchah ngaihthlak a ni.