Hun engemaw chen atang khan kan state atanga hnaivaite Meghalaya-ah hian nuclear siam nana pawimawh em em mai Uranium chu tam tham tak a awm tih hriatchhuah a ni a. Uranium laihchhuah hi mihring hriselna atan a tha lo a ni tih mithiamte chuan an lo sawi fo tawh thin a. A chhehvela chengte tana a hlauhawm dan pawh an lo tlangaupui nasa thin. Chuvangin Khasi mipuite pawhin lakchhuah duh lo hian an lo bei rei tawh.
Helaia Uranium hi India sorkar chuan laihchhuah tumin an lo bei ngar ngar a. Mahse a ram miten an duh lo a. Sorkar a chet dawn hlek chuan an state sorkar chu mipuiin an nawr buai nghal zel. Forest Conservation Act 1980 tlawhchhanin state sorkar chuan lakchhuah phalna hi a pek a ngai a. Chu tak chu mipui hlauh vangin state sorkar chuan clearance a pe ngam ngai lo a, vawiin ni thleng hian engmah kutthlakna a la awm ta lo a ni.
Meghalaya mipuite hian engtizawngmaha he Uranium hi laihchhuah an rem ti lo bur a ni ber. Mahse tunhnaia India sorkarin dan a siam thar Forest Conservation Amendment Act 2023 ah chuan state sorkar thuneihna a awm ta lova. Central sorkarin ram tana pawimawh a tih forest area chu a duh duhin a khawih a thiang ta a. Central sorkar chuan he dan hnuaiah hian Meghalaya a Uranium pawh hi lakchhuah zai an rel dawn hnai hmel ta. Mahse, a ram mipui ten an duh loh em avangin eng buaina nge an hmachhawn dawn a hriat ta loh a ni.
Keini ramah pawh hian eng thil hlu nge awm dap ruk mek a ni reng tih sawi a ni a. Tunlai khawvela leilung a thil pawimawh tawpkhawk zinga an sawi Rare earth element pawh kan ramah hian awm ngeiin sawi a ni. Tunhma kha chuan heng thil hi central sorkar hian a rawn tawng pawng dap ngawt thei lova, a duh duhin a laichhuak thei hek lo. Mahse FCAA dan hman a nih hnu hi chuan central thuneihna hnuaiah khung luh a nih tak vek avangin state sorkar leh mipui ten sawi tur kan nei ta lo. An duh leh an hai ang a, an duh duhin an sawp tawh ang. Chu dan chu kan state sorkarin mipuite aiawhin an pawm ta tlat si a. Mipuiin kan duh lova, kan ram hi duh duha sawisak kan phal lo a ni kan ti ngawt thei tawh lo. Lo duh loh chuan buaina hmachhawn a ni nghal dawn.
Meghalaya buaina hmabak leh keini hi han chhui chiang vang vang ila, FCAA 2023 kan lo pawm pui thuai ringawt mai hi a pawi dawn em? I ngaihtuah chiang ang u. Central lama tlaktlum duh vanga an thu thu a awm ngawt ngawt mai hi kan hnam tan a va pawi dawn em. He dan kan sorkarin a pawmna hi chu kan state assembly ngei hian a duh chuan a la hnuk let leh thei ngei ang. Ngaihtuah nawn atan hmang hram se.