Election Commission of India (ECI)-in Bihar Legislative Assembly inthlan hun a puang a, IANS-Matrize News Communications-in mipui ngaihdan a lakna thar berah chuan 57% chuan Prime Minister Narendra Modi-a huhang chuan inthlanah hian ‘nghawng lian tak’ a nei dawn nia an ngaih laiin 8% chuan thil dang a nih an ring.
Inthlan hi November 6 leh 11-a thawh hniha neih tur a ni a, November 14-ah result puan a ni ang.
Ngaihdan sawitu 35% chuan BJP chu Bihar tana sorkar tha ber turah an ngai a, JD(U) 18%, RJD 13%, Jan Suraj 8% leh Congress 2% an ni.
Ngaihdan lakna hi inthlan ni puan hma lawka lak niin Chief Minister Nitish-a sorkar chu dan leh thupek kenkawhah tha ti an awm laiin hna nei lo tam leh thil man sang chak lutuk chu NDA-in sorkar leh an tum a nih chuan hma an lakna turah an ngai hlawm.
Chief minister atan chuan Nitish Kumar (JD-U) chu mipui duh ber a la ni a, vawiinah inthlan ni ta se 42%-in an thlang dawn a. Tejashwi Yadav (RJD) chuan 15% hmu phakin Jan Suraaj Party hruaitu, Prashant Kishor chuan 9% a hmu phak.
IANS-Matrize ngaihdan lakna, ‘Opinion Poll Report @ Bihar’ tia an vuah hi mipuite chu thil hrang hrang, bialtu MLA chet dan leh mipui hamthatna tura scheme kalpui leh hruaitute an ngaihdan thlenga zawh an ni.
Nitish Kumar-a kaihhruai sorkar kal mek chu thaa ngai an tam hle a, 42% chuan ‘tha tak’ an ti a, 31%-in ‘tha’ an ti a, belhkhawmin 73% laiin tha an ti.
Dan leh thupek kenkawh thuah sorkar hian 72% tha titu nein a hmaa Lalu Yadav-a sorkar hun lai (10%) chu a khum chiang hle a, 12%-in tha lo tak zet tiin 6%-in ngaihdan an nei lo.
Mipui hlawkpui chi scheme kalpuiah electricity unit 125 a thlawna hman tura sorkarin a ti chu 61% chuan an thatpui tak zet an ti a, 9%-in thatpui thawkhata an ngaih laiin 21%-in hlawkpuina an nei lem lo niin an insawi.
Hmeichhiate hnena a tahtawla Rs 10,000 pekna, Mahila Rozgar Yojana pawh 52% chuan hlawkpui hlea an inngaih laiin 10%-in hlawkpui thovah an inngai a, 19% chuan hlawkpuina an neih an inhre lo.
Eptu ni mek, RJD-in sorkar hna nuai 10 siam an tiam chu 61% chuan ‘an ring lo hulhual’ a, 18%-in ‘an ring nghet bur’ a, 11%-in ‘an ti ve mahna’ an ti a, 10% chuan an tihhlawhtlin an ring ngam chiah lo.