Aizawl: Chief Minister Lalduhoma chuan sorkar ukil zingah sorkar chak ngei ngeina tur nia an ngaih thubuai thenkhatah delay a awm vanga sorkar tanhmun a chhiat phahna thlen kawngah fimkhur a tul tih a sawi.
Nimin khan Chief Minister Lalduhoma chuan a department enkawl Law & Judicial buatsaih ‘Training for Government Advocates/Public Prosecutors & Nodal Officers of Court Cases’ I&PR Auditorium-a buatsaih a hawng a. He hunah thu sawiin chief minister chuan, sorkar ukil te chu sorkar tana inhlawha court-a ding thin an ni satliah lo va, dikna vawng himtu, mipui sorkara mipui aw, mipui leh sorkar chanvo vengtu leh hai chhuahsaktu an ni tih sawiin, court-a sorkar aw an nih avangin mi dik lote hmaa tlawm duh ngai lo nun hi anmahni kaihruaitu ni se a duh tih a sawi.
Sorkar ukil an ni emaw, private ukil an ni emaw, ukil tha chu a hnathawh atanga teh a ni tih hretu vek an ni tih sawiin chief minister chuan, “Mi tam tak chu thahnemngai takin in thawk tih kan hria a, heng mite chungah hian kan lawm thin hle. Amaherawh chu, kan chak ngei ngeina tur nia kan ngaih case thenkhatah delay a awm vanga sorkar tanhmun a chhiat phahna a thleng zauh zauh thung. He mi kawngah hian kan fimkhur a tul a ni,” a ti.
Inkhawmah hian Law & Judicial Secretary T.L Guite pawhin thu a sawi.