Cristiano Ronaldo chu tuna football la khel zinga billionaire ni thei hmasa ber a nih thu Bloomberg Billionaire Index chuan a tar lang.
Kum 40 mi, Ronaldo hi infiamna huanga player hlawh hnem ber a ni mek a, kumin kum tir lam khan Saudi Pro League club Al Nassr-ah contract thar a ziak a, a contract hlut zawng hi $ maktaduai 400 chuang nia sawi a ni a. A hausakna hi £ tluklehdingawn 1.045 vel nia chhut a ni.
Bloomberg chuan Ronaldo hausak zawng a chhut a, Armani leh Nike nena an contract chungchang leh sumdawnna hrang hranga a inrawlh dan thlengin a chhut a, footballer zinga billionaire hmasa ber a nih thu a puang ta a ni.
Portugal forward hi international football-a goal khung hnem ber a ni bawk a, ram tan vawi 223 a inlanah goal 141 a khung tawh a. A chhungte lamin chawl mai tawh tura an nawr laiin, chawlh a la tum lo a, kum hnih khat chhung la inkhelh a tum thu Canal 11 a hrilh.
“Ka chhungte chuan inkhelh chawlhsan tawh turin min duh, engkim ka hlawhchhuak tawh niin min hrilh. Goal 1,000 khung kher hi a tulna a awm loh thute min hrilh a. An ngaihdan hi ka tawmpui ve lo. Thil tha tak tak ka la thlen thei niin ka inhria a, ka club leh ka ram ka la pui thei niin ka inngai a, eng vangin nge ka chhunzawm zel loh ang?” a ti.
“Ka hlawhtling nia ka inhriat hunah ka chawl ang. Kum tam ka nei tawh lo tih ka inhria, he hun rei lo te ka la neih hi hlim taka hman ka tum a ni,” tiin a sawi.