Hmasawnna zar zo ve tu kan nih a ngai

Kum 34 chhung zet mai chhung kha Communist Party (maxcist) of India chuan West Bengal ah ro an rel a. Kum 2006 ah khan CPI(M) sorkar chuan an state hausakna a lo pun zel theih nan Tata company nen inremna siamin Singur hmunah Tata Nano car siamna tur ram hectare 1000 zet mai a pe a. Hei hian mi tam tak leilet siamna ram chu a su hek dawn a ni. Sorkar leh company inremna a an eizawnna chan tur mirethei tam tak chu an lungawi thei lova. Chu an lungawi lohna avang chuan nawrhna nasa tak an huaihawt a. Tuna West Bengal chief minister ni ta Mamata Banerjee chuan mirethei zawkte dinhmun harsat turzia a ngaihtuah puiin dik a ti thei ta lova. An nawrhna chu a theih tawpin a pui ta a ni. Buaina pawh a nasa hle. Mahse an sorkar chuan mipui a ngam ta lova, a tlawm a, mirethei ten an eizawnna an nei leh ta. CPIM sorkar pawh kum 2011 khan a tla zui a. Tata company lam pawh Gujarat lamah an insawn fel ta bawk.

Hmasawnna hi mitinin kan duh vek mai. Khawvelah hian mi aia rethei zawk nih kan hlau a. Chumi avang chuan kawng tinrengin kan bei a. Sorkar te pawhin ram tihhmasawn an duh vek. An state/ ramin hma a sawnna turin hna an thawk nasa vek a. Ram leh ram indo thlengin hmasawnna umin an inchuhna lamah thil a thleng thin.

Ram hmasawnna kan sawi hian ngaihtuah chian tur a awm. Kan ram hmasawnna chuan engnge a nghawng, mitinin hma kan sawn em, kan hmasawnna chuan kan hnam himna a khawih chhia em, kan sakhua eng angin nge a nghawng, kan nunah a chhe lamin nge a nghawnga a tha lamin tihte kan ngaituah vek erawh a ngai. Vai ramah khuan airport ropui tak kalkawngah mirethei kutdawh leh hmel en pawha chaw khamkhawp ei hmu lo hmel naupang an tam em em a, hmasawnnain a thlawh khumte an tam. Hmasawn duh lutukna avanga mahni hnamzia bo thaka ke pen pawh hi an tam. Chutiang bawkin hmasawnna in a chimchhiat nasat avanga mahni sakhua bosal thak a, a ram pumin sakhuana lam reng reng ngaihtuah lova ri hut hut ringawt pawh an tam mai.

Kan ram dinhmun pawh hi kan enchian a ngai em em a. Hmasawnna hawi zawnga ke kan pen hian a chhunga mizote hian a zar kan zo loh chuan hmasawnna awmze nei a ni ngai lovang. Tunah pawh hian chhim tawp lamah sorkar chuan tuifinriat pawh turin kawng a lai mup mup a. Ram pawh an lai chhe nasa ngial dawn. Hmasawnna leh changkanna pawh heng kawngpuite hian a rawn keng ang. Amaherawhchu, a chhunga cheng mizote hian chu hmasawnna chu a hlawkna kan tel dawn em tih ngaihtuah tel a ngai a. Mipui tana hlawkna a nih loh chuan chu hmasawnna chu mizote tan hmasawnna a ni thei lovang a, chimralna lek a ni dawn a ni. Heng infrastructure kan lo hman tangkai dawn lai hian kan sorkar hian kan hnam himna ngaihtuah chunga, mizo thinlung taka kan ram tan ke a lo pen ve ngat ngat a ngai a ni.

Leave a Reply

error: Content is protected !!