Aizawl: Social Welfare Department & Women & Child Development (SW&WCD) Department Minister Lalrinpuii chuan nimin khan khan Protective Home ni thin, State Social Welfare and Rehabilitation Centre (SSWRC) ni tain SKOCH Award a lak leh kum 35 a tlin lawmna hun chu khuallian niin a hmanpui.
Khuallian Lalrinpuii chuan SSWRC chu an award dawn avangin leh kum 35 chhunga ram tana hna tha taka an thawh theih avanga a lawmpui thu a sawi a. Ruihhlo avanga ramin harsatna a tawhte siamtha turin sorkarin hma a lak thu leh, mipui harsatna sukiang turin theihtawp chhuah zel a tum a nih thu a sawi a. Chung zingah SSWRC rawngbawlna pawh telin, tha taka thuam zel a nih tur thu a sawi.
Social Welfare Department hotute chuan thawktu inlungrualna leh kalphung fel tak an neih avangte, pawnlam mi leh pawl hrang hrangte nena thawhhona tha an neih avang tea dawng thei an ni tih an sawi bawk.
SSWRC hi kum 1990 atanga kalpui niin, Chanmari West (Maumual)-ah a awm a. Hmeichhia, ruihhlo avanga harsatna tuarte enkawlna hmun niin, mi 50 an awm thei a, thla sarih chhungin rehabilitation bakah skill training – puantah, puanthui, beautician, computer course-te zirtir thin an ni.