Aizawl: Ministry of Youth Affairs & Sports-in Viksit Bharat Yuva Connect hnuaia National Youth Icon atana a thlan, Grace Lalrinpari Hauzel, Khatla chu Sports & Youth Services Minister Lalnghinglova Hmar-in MINECO-a a office-ah lawmpuina hun a hmanpui.
Lawmpuina hun hmanah Lalnghinglova chuan, “Grace-i hi a thawhrah avangin National Youth Icon nihna hi phu taka chang thei a ni a, ka lawmpui takzet a ni. A thlangtu pawh Ministry of Youth Affairs & Sports a ni a, a bul tanna hi helama Sports & Youth Services Department-in a lo buaipui a nih avangin keini lam pawhin kan intitatu viau a ni.
“Sports Department lam chu a lo puitu leh buaipuitu kan ni mai a, mi 12 kan tirh chhuah zingah hetiang dinhmun thleng a, chawimawina dawng an awm hi a lawmawm a, ram pum huapin Mizo thalai a chawimawi hle a ni,” a ti.
National Youth Icon atana thlan, Pachhunga University College-a Department of History 5th Semester zirlai Grace-i chuan SYS Department-in kawng engkima an buaipuinaah lawmthu a sawi a, “Youth Icon nihna hi lawmman a ni lo va, mawhphurhna a ni a. Mizoram chauh ni lo, India ram thalaite aiawh leh hmatheh ni tura mawhphurhna a ni,” a ti.
Vikshit Bharat National Youth Icon hi India-in kum 2047-a ram hmasawn (developed nation) zinga chhiar tel nih a tumna kawnga Viksit Bharat Yuva Connect hnuaia an hmatheh tura palai nihna a ni a. Grace-i hi January, 2025-a Mizoram aiawha Young Leaders Dialogue, New Delhi-a kal zinga mi niin a kalte atanga ram pum huapa titha thlan chhuahah a tel a; India Prime Minister hmaa presentation nei a, lunch eipui tur mi pahnih thlan chhuah zingah a tel nghe nghe.
Lawmpuina hunah hian Sports & Youth Services Department Secretary V Lalsangliana hoin department hotute bakah Grace-i nu leh pate an tel.
Nimin vek khan Grace Lalrinpari Sailo chu a chenna inah Mizo Cultural Organisation (MCO)-in lawmpuina an hlan bawk.