Nimin khan Synod Conference Centre, Mission Vengah Lalnuntawma Fanai lehkhabu ziah “Krista Pasaltha Zikkawia” tih chu a duh apiang lei a, chhiar theih turin Rev. Dr. Rosiamliana Tochhawng, Executive Secretary, Mizoram Synod in a tlangzarh.
Tlangzarh inkhawmah hian Rev. Rosiamliana chuan Mizo Kristian leh rawngbawltu chanchin a ni tih sawiin, “Kohhran leh Mizo kristiante chanchin hlu tak a ni,” a ti.
Krista Pasaltha Zikkawia lehkhabu hi amahin kum 44 chhung, kum 1913 leh August, 1957 inkara a rawngbawlna chanchin a ziahna, diary ni si lo behchhana buatsaih a ni.
Lehkhabu thlirlawktu, Dr. H.Laldinmawia, Asst. Prof., Pachhunga Univesity College (PUC) chuan Zikkawia chu tuma hriat loh, Synod Literature & Publication Board-in ‘Kohhrana mi biru tangkaite’ tih bu a siamah pawh tel pha lo ni mah se a rawngbawlna erawh a nep lo va, vanrama miten a chanchin duhawm tak an lo hriat tawh chu thangtharten an hre ve dawn ta tih a sawi.
Krista Pasaltha Zikkawia chu kohhran chanchin tling pha, Sailulak leh Leng kohhran chanchin tam tak awmna niin ziaka awm ngei a nih avangin a rintlak tih a chian bawk thu a sawi a ni.
A chanchin khawr puma lehkhabua siamtu, Manuna hi Zonet TV-a mi kawmtu hriat hlawh tak niin a lehkhabu hmasa, Mizo zinga thawhrim avanga ding chhuakte chanchin a ziahna, ‘Thangchhuah Tlang’ pawh a lo buatsaih tawh a. Tuna a lehkhabu hi kum nga dawn, kum 2020 atanga a buaipui a ni.