Aizawl: Supply Minister B. Lalchhanzova chuan Supply kudam zawng zawnga Digital Weighing Scale (DWS) hman a ni tawh dawn tih sawiin, hei hi mipuiin sorkara rinna an nghah theihna tura hmanraw tangkai tak a nih thu a sawi.
Thawhlehni khan FCS&CA kudam zawng zawnga hman tur, Mizoram sorkarin Rs nuai 86 a hmuh atanga a lei Digital Weighing Scale (DWS) thar 112 khuhhawnna chu Govt. Muanna Godown (GMG), Muanna Veng-ah hmanpuiin; Saitual, Khawzawl leh Champhai district-a hman tur DWS 35 phurtu motor a vai liam nghal.
He hunah thu sawiin Minister B. Lalchhanzova chuan, FCS&CA kudam zawng zawnga DWS hman a ni tawh dawn chu lawmawm a tih thu sawiin, mipuiin sorkara rinna an nghah theihna tura hmanraw tangkai tak a nih thu a sawi a. FCS&CA department chu thla tina mipui mamawh petu an nih avangin dik tak leh rinawm taka hna an thawh a pawimawh thu a sawi a. An hnathawhna apiangah hnuhma tha an hnutchhiah a pawimawh tih a sawi.
Aizawl East leh Aizawl West DCSO office tur MINECO-ah sak a nih dawn bakah, tun dinhmunah hian mipuite ngaihngam taka an awm theihna tur khawp buhfai kudamah an chhekkhawl thu a sawi bawk.
DWS hi district hrang hranga FCS&CA kudam zawng zawnga hman tur 112 lei a ni a, tum khatah quintal 25-a rit a buk theih a ni. Nimin vek khan district pathum Saitual, Khawzawl leh Champhaia FCS&CA kudam hrang hrangtea hman tur DWS 35 motor-a phurh chhuah nghal a ni.