Aizawl: Aizawl Municipal Corporation (AMC)-in Aizawl City Traffic Police tana a leisak T-shirt leh lukhum (baseball cap) chu nimin khan an hlan.
Thuampuia AMC Conference Hall-a hlanna inkhawmah Aizawl Mayor Lalrinenga Sailo chuan, AMC chuan khawpui sorkar anih angin Aizawl khawpui inrelbawlna kawngah mawhphurhna tam tak a nei a, an hmalakna kawngah Aizawl Traffic Police te nen thuneihna kenkawh kawngah thawhhona tha tak nena mipui tan an tanrual thin thu a sawi a. Hun lo kal zelah pawh thawhhona tha zawk an neih a beisei tih a sawi a. AMC chu Aizawl khawpui inrelbawlna tha zawk thlen theihnan thawhhona kawngah a inhawng reng tih a sawi.
Dy. Mayor Thanglura pawhin thu sawiin, ram dang atang pawhin Aizawl-a traffic discipline thatzia an lo hriat hle thu a sawi a. Hna thawk tha chhunzawm zel tur leh inhretawn zel turin Traffic Police te chu a chah.
Aizawl Traffic SP Ruatsanga Ralte chuan Aizawl City Traffic Police te chu smart, fresh leh polite taka awm tura tan an lak thu leh mi tam tak tan Mizoram hmel lanna an nih avangin tan an la nasa hle tih a sawi a. An hnathawh hahna hriatpuitu leh duhsaktu AMC chungah lawmthu a sawi.
Inkhawm hi Municipal Commissioner Joseph H Lalramsanga’n a kaihruai a. AMC hian Aizawl City Traffic Police hnenah t-shirt 315 leh lukhum 315 an hlan a ni.