West Bengal-a rorel mek, Trinamool Congress (TMC) chuan Thawhlehni khan Tripur-a an party hmunpui chu he state-a rorel lai, BJP thalaiten an suasam niin an sawi.
He thil hi a hma ni chiaha Bengal hmar lama tui lenna hmuna BJP MP Khagen Murmu leh MLA Sankar Ghosh ten beih an tawh tuk chiaha thleng a ni.
State TMC President Santanu Saha-a chuan BJP Yuva Morcha member tam takin an khawpui, Agartala-a Motor Stand-a an party pisa chu an bei niin a sawi.
“A chhunga bungraw thenkhat pawh an tichhia a, signboard pawh an tichhe bawk a. Beitute hi an au rual bawk a, TMC demna thu an au chhuahpui a ni,” a ti.
Saha-a chuan an party hian tual chhung police station pawh an hriattir a, an pisa chu beih ngei nia an hriat thu an thlen a; mahse, engmah hmalakna a awm lo niin a sawi bawk.
“Kolkata atangin party aiawhte naktuk (Nilaini) hian thil awm dan enin an lo kal dawn a. Kan thutkhawm zawhah FIR pawh kan thehlut nghal ang,” a ti.
State BJP thupuangtu, Subrata Chakraborty-a chuan engmah a sawi lo va. West Tripura SP Namit Pathak leh Additional SP (Urban) Drubha Nath te pawhin TMC thil sawi leh BJP an puhnaah hian engmah thuchhuah leh sawi an la nei lo.
Agartala-a TMC aiawh kalte MP pathum – Pratima Mondal, Sushmita Dev leh Saayoni Ghosh te bakah West Bengal minister Birbaha Hansda, party hruaitu Kunal Ghosh leh Sudip Raha te an ni.
Kolkata-a TMC hruaitute chuan an party aiawhin Tripura an tlawh tur hi hmarchhaka BJP-in ‘tharum thawhna leh mi tihthaihna nunphung’ an neih ‘do leta politic hmanga thu chah pawimawh hrilhna tur’ a nih thu an sawi.
Hetih lai hian BJP pawhin Thawhlehni vek khan Agartala-ah hian Bengal hmar lama a mit ko ruh tihtliahsaka kutthlak a nih avanga ICU-a awm mek, Murmu leh Ghosh-a te kutthlak duh lohna an lantir ve bawk.
BJP Sadar district president Ashim Bhattacharjee-a chuan Tripura mipuite chuan TMC chief Minister Mamata Banerjee-i chu CPI(M) a um chhuahna kawngah chuan an thlawp em em laiin West Bengal-a mipuiten chief minister tih tura an beisei ang chu a pha lo tak zet tih a sawi.
“Kan MP leh MLA chu Bengal hmar lama Lakkhi Puja-a tui lian tuarte hnenah chhawmdawlna an sem lai kutthlak an ni,” a ti.
Bhattacharjee-a chuan Banerjee-i hian ‘nakuma West Bengal assembly inthlan turah an party an chak loh a hlau’ niin a sawi a. “BJP an chak dawn nia hriain TMC mi sualten beihna hi an thlan a. Kum 2026-ah chuan West Bengal-a TMC sorkar hi kan nam thlu dawn a, kum 2018-a Tripura-a CPI(M) kan paih thlak ang kha a thleng dawn,” a ti.