Aizawl: UD&PA Minister K. Sapdanga’n Aizawl Municipal Corporation (AMC) a tlawh a, AMC hmalakna leh kalzel dan tur hmachhawpte thlirhona hun a hmanpui.
Nilaini tlaia AMC a tlawhnaah K Sapdanga chuan, AMC chu UD&PA Department hnuaia mipui tana service-na hmun pawimawh ber leh lian ber a nih thu a sawi a. Thawhhona tha tak nei tura hmalaknate a hlawhtling nia a hriat thu a sawiin, party sawi lova state sorkar leh AMC thawhhonate, AMC a thawkte leh UD&PA department secretariat leh directorate a thawktute inpawhtlannate fakawm a tih thu leh hnathawhho theihna tur comprehensive agreement tha tak an siam chu tha a tih thu a sawi.
Minister chuan AMC chu tuna a thlen chin aia mipuite tana a tangkai zawk theih dan ngaihtuah tur leh, municipality hmang tangkai thiam ber pawl nih tumin tan la tur leh hma la tlanga langtlang taka hna thawk zel turin AMC hotute a chah bawk.
Aizawl Mayor Lalrinenga Sailo pawhin state sorkar nena thawhhona tha tak an neih thu a sawi a. AMC ngaihsak em emtu UD&PA minister an nei chu lawmawm a tih thu a sawi a. Corporator te hmalam huna kal zel dan turte, an dinhmun ngaihtuahsak zel tur tein Minister a ngen.
An inkawmnaah hian AMC Commissioner Joseph H. Lalramsanga leh Joint Municipal Commissioner Lalremruata Kullai ten AMC hnathawh hrang hrangte leh hmachhawp an sawifiah a ni.