Aizawl: Mizoram sorkarin Information Public Relations Printing & Stationery (IPRP&S) Department kalpui a duh dan leh hmachhawp a neihte sawipuiin nimin khan I&PR Minister thar B.Lalchhanzova’n MINECO-a a pisa-ah IPRP&S department-a Administrative Officer te leh Directorate lama Senior Officer te a kawm.
An inkawmnaah Minister B. Lalchhanzova chuan, a department hotute chu department dangte tha taka thawhpui thiam turin a chah a. A department hnuaia hmalakna kaihhnawihah a hriat tur awm chi reng rengte chu thutlukna tha zawk siam a nih theih nan a hnenah thlen vat thin turin a chah.
Sorkarin mipui tana hna a thawh te, hma a lak mekte, thutlukna a siamte, mipui tana hamthatna a siam ang chi te chu a nihna tur anga mipuiin an chhawr theih nan, mipuiin chiang takin an hriat a ngai tih a sawi a. Notification, scheme, policy leh sorkar hmalakna puanzar leh zirtirna kawngah I&PR hman tangkai leh zual a ngai a. Hemi kawngah hian department tin ten I&PR kaltlangin Public Relations huanga tan an lak thar a ngaih thu a sawi a. Sorkar department ten Printing & Stationery an hman tangkai dan te pawh ennawn a tul thu a sawi bawk.
Thutkhawmah hian IPRP&S Secretary Betsy Zothanpari Sailo, I&PR Director K Vanlalsangi leh Printing & Stationery Controller Benjamin Lalzama ten department hmalaknate an sawifiah bawk.