Aizawl: Chief Minister Lalduhoma’n Mizoramin a mikhual tam ber tur vaite lo hlauh ngawt tur an nih loh thu a sawi.
Sorkar laipuia Ministry of Tourism leh Mizoram Tourism tangkawp buatsaih, Travel Fest 2025 ni hnihna chu Aijal Club-ah Ningani khan neih chhunzawm a ni a. He huna khuallian Chief Minister Lalduhoma chuan a hmanpui.
Chief minister chuan Mizoramah tourism industry hi nasa takin a thang chho mek a, kum hmasa statistic atanga hmuh danin, khualzin hi zaa 139.50 laiin an pung a. Mi nuai nga leh singhnih chuan an rawn zin a, Mizoram mipui zatve deuh thaw a nih thu a sawi.
Rel lo lut hian nasa lehzualin a Mizorama rawn lut a tipung ngeia a rin thu sawiin chief minister chuan, “Chuvang chuan, mipuite hi mikhual nei thiam, hnam dangte khawsakpui thiam kan nih a ngai. Kan ramah hnam dangte ngaihngam takin an rawn zin thei tur a ni. Zo nun ze mawi, tlawmngaihna leh rinawmna, hawihhawmnate kan lo chawi nun thiam chuan sum leh paiah chauh hlawkpui lovin kan ram leh hnam hi a lo par vul tel dawn a ni,” a ti.
“Mikhual lo kal tam ber turte hi vai kan tih mai, kan Indian-puite an ni dawn a. Tumah hi lo hlauh ngawt tur an ni lo, lo hmuhsit tur pawh an ni hek lo. Dan ang taka rawn zin, an haw a huna haw ve leh mai tur an ni a. Kan rama sum leh pai an rawn thlauh kha kan tan a tha em em a ni,” a ti bawk.
Hma sawn zel theih nana mamawh dik tak hriat zel a tul tih sawiin Lalduhoma chuan, “Hmalakna tur dik takah zel kut hi thlak chat chat ila, kan resource neih ang angte hlawk takin kan hmang thei ang. Chumi atana tangkai Mizoram Travel Fest 2025 kan buatsaih hi a hlu a ni,” tiin, Travel Fest ngaihtuah chhuaktu minister leh a thawhpuite chungah lawmthu a sawi.
Inkhawmah hian Tourism Minister Lalnghinglova Hmar-in kal khawmte lawmna thu a sawi a. Tourism department leh EF & CC te chuan Eco-Tourism kalpuina tur inremna (MoU) an ziak bawk.
Inkhawmah hian Steve Borgia, Founder, INDeco chuan ‘Role of Community Partnership in Sustainable Tourism’ tih thupui hmangin thu a sawi a. Chawhnu lamah zirhona leh sawihona neih chhunzawm a ni.