Mizo Zirlai Pawl (MZP) chuan nimin khan chanchinbu mite an kawmnaah Sairang rel station chu vil uluk ngai leh, ILP chungchangah ngat phei chuan sorkar a khauh lehzual a tul thu an sawi a, a hmuna an zu enfiahna report hrang hrang an tarlang bawk.
MZP te sawi danin Sairang rel station hi state sorkar inpeih lo chunga hawn a ni an ti a, Delhi leh Kolkata lam atanga lokal hnamdangte chu online hmanga ILP dil sa an nih tlangpui avangin a la ziaawm deuh a, Guwahati atanga lokal erawh an khat reng chungin ILP pekchhuah a tlem hle niin an sawi.
Dan dik lova kan ram lo lut tam tak an awm phah ngei niin an sawi a, hei hi enfiah zui a tha hle. Sorkar in duty na hmun a siamah ILP diltu an tlem thei hle niin an sawi a, rel a lo chuang chho ngaihtuaha ILP siamtir an tlem leh, an let leh lam engmah hriat tur chu veiawm leh ngaimawhawm tak an nih thu an sawi bawk.
MZP te hian a hmuna an zu kalchilh a, an enfiah lai hian ILP nei lo, a ruka chhuah tum mi 30 chuang an man niin an sawi bawk a, thenkhat phei chuan ILP neih ngai a ni tih an hriat loh hrim hrim thu an sawi.
Hmasawnna hnathawh leh kan chhawr chhoh mek lai hian keimahni lam hi kan lo inven a tul a, nasa taka kan inhmakhua pawh a va tul em. Sorkar hian ILP duty-na hmun hi ngaihtuah berah nei se la, chhuah ruk theihna hmun tam lutukte hi vei bera neiin, a duty na hmunah pawh hian police tam zawk dah thei ngei teh se. Tun atanga kan vil hneh loh chuan hnamdang, phalna laa lo luh ngaite hi kan tam hneh lo mai ang tih a hlauhawm ta.