Afghanistan-a social media platform thenkhata thil awmte chu khuahkhirh a ni tih Taliban sorkarin a sawi.
Communications & information technology ministry chuan Facebook, Instagram leh X telin platform thenkhata thil dah chhuahte chu thlitfim hmasak a ni tih a sawi niin BBC Afghan chuan a tar lang.
Eng ang thil chiah nge thlitfim a ni tih erawh hriat theih a ni lo va. Kabul-a social media hmangtu thenkhat chuan an Facebook account-a video thenkhat chu en theih a ni tawh lo va, Instagram hman pawh khuahkhirh a ni tih an sawi hlawm.
Hetianga social media-a pho chhuah thil an khuahkhirh hma lawk hian Afghanistan-ah hian ni hnih chhung internet leh inbiakpawhna dang tihtawp a lo ni tawh bawk.
Internet tihthih hi khua leh tuiten an buai phah hle a, tihnun a nih leh pawhin an lawm nasa hle.
Darkar 48 chhung hman theih loh a nih chhung hian sumdawnna leh thlawhna thlengin a tibuai a, rikruma hman tur chauh tihnun a ni a, mi tam tak chuan kum 2021-a Islamist pawlin thuneihna an chan leh hnua hmeichhia leh hmeichhe naupangte nasa taka khuahkhirh an nih tawh avangin hei hian a tihchep lehzual an hlau hman hle.
Afghanistan-a social media hmangtute chuan Thawhlehni atanga province eng emaw zata khuahkhirh a ni chu an sawisel hlawm.
Taliban sorkar chuan, “Facebook, Instagram leh X-a thil chhawp chhuahte thunun a ni a. Internet tihthih vek a nih loh kan beisei a, thlitfim hi ram bial zawng zawng leh province tam zawkah kalpui a ni,” an ti.
Sorkar atang hian khuahkhirhna kalpui chhan sawi fiahna chiang tak a la awm lo va. Kar hmasaa internet an tihthih pawh a chhan an lo sawi lo tawh bawk.
Thuneihna an chan hnuah Taliban hian Islamic Sharia dan tlawhchhanin khuahkhirhna hrang hrang an kalpui a. Afghan hmeichhiate chuan hmeichhe naupang kum 12 chung lamte sikul an kai a khapsak avangin internet hi khawvel pawn lam chin an hriatna leh an inzirna ber a nih thu an sawi.
September atang khan hmeichhiate hna thawh pawh khuahkhirh a ni a, an lehkhabu ziahte chu university atangin paih chhuah a ni.