Aizawl: Dr. Lorrain Lalpekliana Chinzah, Adviser to Chief Minister (H&FW, A& FW), Lawngtlai East bialtu MLA ni bawk leh Donny Lalruatsanga, Lawngtlai Bawrhsap te chuan Inrinni khan Solid Waste Management System, Lawngtlai chu an enfiah a. Er. Robin Vanlalhrina (UD&PA) chuan a tawiawm a ni.
Dr. Lorrain Lalpekliana Chinzah chuan Lawngtlai khawpuiin bawlhlawh sawngbawlna tha tak a nei tur chu lawmawm a tih thu a sawi a. “Peih fel a nih hunah chuan khawpuiin faina leh thianghlimna kawngah nasa takin hma a sawn phah dawn a ni,” a ti.
Mipuiten an mamwhna hriaa chak leh tha taka hnathawh bakah a hun taka zawh fel a tul hle a tih a tar lang a. Sorkar hmalakna kawng hrang hrangah tha tak, rintlak leh huntiam chhunga zawh a nih theih nan contractor-te pawhin theihtawp chhuah a tul tih a sawi.
Solid Waste Management System, Lawngtlai chu mipuiten hman an châk tawh hle tih tar langin chak taka thawk turin contractor-te a chah bawk.
Donny Lalruatsanga, Lawngtlai Bawrhsap chuan chak zawk leh tha taka hnathawh a nih theih nan theihtawp chhhuah a tul thu a tar lang a. Hnathawh mekte pawh endik reng a nih thu sawiin uluk taka endik chhunzawm zel a nih tur thu a sawi a. Faina leh thinghlimna kawnga a sulsutu pawimawh tak a nih tur thu a tar lang a ni.
Solid Waste Management System, Lawngtlai hi Urban Development & Poverty Alleviation (UDPA) hnuaia sak niin, Rs. 6,97,70,000 senna tur a ni a. Hna hi October, 2024 khan tan a ni a, kum hnih chhunga zawh fel tura ruahman a ni.
Solid Waste Management System-ah hian Wet Waste Composting Centre, Dry Waste Composting Centre, Site Office cum Staff quarters, Sanitary Landfill leh a dangte a awm dawn.
KMMTP kawngpui Phaikhangmuala awm niin a sak hna thawktu hi Lalfamkima, Aizawl a ni.