Aizawl: Inrinni tuk khan India ram pum huapa Rashtriya Poshan Maah (National Nutrition Month) 2025 hman mekah Men-Streaming Programme pualin cycle rally neih a ni.
Cycle rally hi Women & Child Development Department hnuaia District Programme Officer, Aizawl te, CDPO Aizawl Urban ICDS Project te leh Mizoram Cycling Association te tangho buatsaih a ni a. Vana Pa Hall kawt atanga tlan tanin AMC Office, Thuampui thleng rally hi neih a ni.
Lalrammawii Kawilam, Asst. Director & DPO, Aizawl chuan rally hi a vai liam a. Lalnufela Pachuau, CDPO, Aizawl Urban ICDS Project leh Dr. Malsawmkima, President, Mizoram Cycling Association ten thu an sawi.
Men-Streaming Programme pual hian mipate zirtirna leh thutiam sawi rualna hun hman a ni a. Department aiawhte kaihhruaina hnuaiah chhungkaw enkawl kawnga pa leh mipate mawhphurhna te, hriselna tura ei leh in tha pawimawhna te, naupang than lenna kawnga pa berin hma a hruai a pawimawhziate inzirtir a ni a. Nupui fanaute hrisel tura enkawl kawnga chhungkaw pa mawhphurhna te, chhungkaw nuam leh chhungkaw hlim siam tura pa ber pawimawhzia te, taksa tana hrisel lo ei lo tur leh lei lo tura intiamna te sawirual a ni bawk.
Cycle Rally-a Mizoram Cycling Association atanga member thahnem tak an thawk chhuak thei chu Rashtriya Poshan Maah 2025 hman mek hlawhtlinna kawng pawimawh a nih avangin Women & Child Development Department chuan lawmawm a ti tak zet a ni.