Aizawl: Mizo Students’ Union General Conference vawi 23-na Vantlang Inkhawm hnuhnung berah Chief Minister Lalduhoma chu khuallian niin Mizote, Mizoram chhunga hna awm ngeiah pawh kan tling thei lo thin chu zirlaite kan tan a tulzia tilangtu a nih thu a sawi.
CM chuan sawrkarin kan ram hma hun, zirlaite a ngaih pawimawh em avangin he conference hi rawn chhim a nih thu a sawi a. Zirlaiten study tour an mamawh thinna te chu hriain nakum budget-ah chuan budget an dah belh tur thu a sawi a, scholarship pawh central ministry-in sum an peih fel veleh an pek chhuah nghal thu a sawi bawk.
MSU chu tun hnaia zirtirtu qualify lo chhawr chhunzawm chungchang te, advertisement tel lova hna lak chungchang an do te chu fakawm a tiin sorkar khalh ngiltu pawimawh tak ni zel turin a chah a. Kalphung tharah chuan direct-a hna lak tur reng reng chu advertisement tel lova lak an nih tawh loh tur thu leh chung hmanga an hna lak reng reng chu regularize theih vek an nih tawh tur thu a sawi bawk.
Zirlaite chu mi dang sawi ngawt ring lovin sawrkar hmalakna te chu a that leh that loh mahni a zir chiang zel turin a chah a, chutih rual chuan sawrkar hnuaia hamthatna tam takte pawh zirchiang turin a chah nghal a. Mizoramah central-in school tha tak tak a rawn din – EMRS leh JNV ah te in enroll nachang hre turin zirlaite chu a hrilh a, Mizorama kan neih chhun, Chhingchhipa Sainik School pawh seat ruak a la tam thu leh Mizo ten kan luah khah loh chuan hnam dang ta tur a ni ringawt dawn a ni a ti bawk.